Upwork-ის უახლესი კვლევის შედეგები - ფრილანსერები, სხვა დასაქმებულებთან შედარებით, უფრო აქტიურად იყენებენ ხელოვნურ ინტელექტს

დაივიწყეთ დარდი იმაზე, თუ როგორი იქნება სამუშაო გარემო მომავალში. სამუშაო გარემო და რეალობა გასული წლების განმავლობაშიც საგრძნობლად შეიცვალა პანდემიის და ხელოვნური ინტელექტის გავლენით.

2023 წლის მიწურულს კომპანია Upwork-მა გამოაქვეყნა 2023 წლის კვლევის შედეგები. Upwork ფრილანსერების ერთ-ერთი ყველაზე ცნობილი ონლაინ პლატფორმაა. კვლევის ფარგლებში გამოიკითხა 3000-მდე მონაწილე. შედეგებმა აჩვენა, რომ ამერიკელი დასაქმებულების 38% ფრილანსერია, რაც დაახლოვებით 64 მილიონი ადამიანია. გასულ წელთან შედარებით ეს მაჩვენებელი 4 მილიონით გაიზარდა.

Upwork-ის კვლევის თანახმად:

- ახალგაზრდა თაობა, წინა თაობებთან შედარებით მეტად იწყებს ფრილანსზე მუშაობას - კერძოდ, კვლევაში მონაწილე Gen Zის 52% და მილენიალების 44% ფრილანსერია, შედარებისთვის იმავე კატეგორიაში Gen X-ის მაჩვენებელი 50%-ია, ხოლო ბეიბი ბუმერების 26%.

- ფრილანსერები ხდებიან კონტენტ კრეატორები და მუშაობენ სახლიდან - ფრილანსერების დაახლოებით 23 % ინფლუენსერია და მუშაობს კონტენტის შექმნაზე, აზიარებს ლაივ სტრიმებს ან სოციალური მედიის პოსტებს. 47% დასაქმებულია ცოდნაზე დაფუძნებულ ინდუსტირებში და 60% მუშაობს დისტანციურად.

- ფრილანსერები უფრო მეტად იყენებენ ხელოვნურ ინტელექტს - ფრილანსერების 20% რეგულარულად იყენებს ხელოვნურ ინტელექტს, სხვა დასაქმებულებში ეს მაჩვენებელი მხოლოდ 9%-ს შეადგენს. ფრილანსერები ხელოვნურ ინტელექტს იყენებენ ინფორმაციის მოსაძიებლად (46%), ბრეინსტორმინგისთვის (35%), სათარგმნად და შეთავაზებების დასაწერად (32%) და კოდის დასაწერად (28%).

ფრილანსერები გამორჩეულად ოპტიმისტურად არიან განწყობილნი კარიერული ზრდის მიმართ - 80%, ხელფასის მატების მიმართ - 76%, მომავალში სამსახურის შესაძლებლობებით -74% და პირადი განვითარების შესაძლებლობებით 84%. როდესაც მათ დაუსვეს კითხვები მომავლის შესახებ, ფრილანსერების 85%-მა მიუთითა, რომ ფრილანსერობის საუკეთესო დღეები ჯერ კიდევ წინ არის.