Google: 6 რამ წარმატებული მენეჯერობისათვის

ხშირად საუბრობენ იმაზე, თუ რამდენად რთულია ადამიანის კარგ მენეჯერად ჩამოყალიბება. მიზეზი კი ისაა, რომ თვისებები, რომლებიც ადამიანს კარგ თანამშრომლად აქცევს, სულაც არ არის საკმარისი წარმატებული მენეჯერობისათვის. საბედნიეროდ, მსოფლიოში არსებობენ Google-ის მსგავსი ორგანიზაციები, რომლებიც ამ საკითხზე წლებია მუშაობენ. მათი გამოცდილება კი საინტერესოა, წარმატებული მენეჯერის „მისტიკის“ ამოსახსნელად.

Google-მა მენეჯერების განვითარების პროექტის Oxygen-ის ფარგლებში შიდა კვლევები ჩაატარა, გამოიკითხა დაახლოებით 10 000 მენეჯერი, შეფასდა მათი მუშაობის ხარისხი, ტოპ მენეჯერების მოლოდინები და მათი ზეგავლენა მენეჯერებზე. ამ მონაცემებზე დაყრდნობით, Google-მა შეიმუშავა ტრენინგი მენეჯერებისათვის, რომელიც დანარჩენ მსოფლიოსაც გაუზიარა და პროგრამის შესახებ პრეზენტაცია საკუთარ ვებ-საიტზე (https://rework.withgoogle.com/) გამოაქვეყნა.

მოდით, გადავხედოთ იმ ექვს ძირითად თვისებებს, რომლისაც Google მენეჯერებში ავითარებს:

1. აზროვნება და ფასეულობები

სტენფორდის უნივერსიტეტის ფსიქოლოგიის პროფესორის, კეროლ დვეჯის კვლევის მიხედვით, Google თავის მენეჯერებში Growth Mindset-ის განვითარებას ცდილობს. Fixed Minset-გან (მიდგომა, რომლის მიხევითაც შესაძლებლობები განსაზღვრულია) განსხვავებით, Growth Mindset-ის მქონე ადამიანებს სჯერათ, რომ შესაძლებლობები განვითარებადია. მსგავსი მიდგომა მენეჯერებს მუდმივი სწავლისკენ, გამოწვევებისა და ექსპერიმენტებისკენ უბიძგებს, რაც ცალსახად მათი მუშაობის შედეგებს ზრდის. ამასთან, წარმატება ყოველთვის მოითხოვს გამძლეობას, შრომისმოყვარეობასა და კონცენტრაციას.

Google მენეჯერებს ხელს უწყობს გაიაზრონ, შეაფასონ საკუთარი, ინდივიდუალური ღირებულებები, რომელებიც ასახულია მათ მართვის სტილში. მენეჯერების მიერ გააზრებული ინდივიდუალური ღირებულებები გარკვეულ მორალურ წონასწორობას ქმნის, ეს კი რთული სიტუაციების მოსაგვარებლად აუცილებელია.

2. ემოციური ინტელექტი

დანიელ გოლემანის მიხედვით, ემოციური ინტელექტი არის უნარი ადამიანს ესმოდეს და როგორც საკუთარი, ისე სხვისი ემოციები და გამოიყენოს ეს ცოდნა საკუთარი ქცევის დროსა და სხვებთან ურთიერთობის პროცესში . მარტივად რომ ვთქვათ, ეს მაღალი თვითშეგნების ფორმაა.

მსგავსი თვითშეგნების მქონე მენეჯერები უფრო ეფექტიან გადაწვეტილებებს იღებენ, უკეთ შეუძლიათ კომუნიკაცია და არიან სანდოები სამუშაო პროცესში წარმოქმნილი პრობლემების მოგვარებისას. Google ის ლიდერშიპის აზრით, როდესაც მენეჯერებს ემოციური ინტელექტი აქვთ, ორგანიზაციის შედეგიანობა 20-30%-ით იზრდება.

3. გამოცდილების გაზიარება

Oxygen პროექტის მიხედვით, პროგრამის მონაწილე მენეჯერები ერთმანეთს საკუთარ გამოცდილებას უზიარებენ. სირთულეებზე, გამოწვევებზე, იმედგაცრუებებზე საკუთარ გამოცდილებას მენჯერებს სუპერვაიზორებიც (მენეჯერის მენეჯერი) უზიარებენ და ასწავლიან, რომ განვითარების პროცესში იმედგაცრუებისა და დაუცველობის შეგრძნება ბუნებრივია, გამოსავალი კი გულწრფელობაშია. მენეჯერების გამოცდილებას სხვები რჩევად იღებენ და საკუთარი კარიერული გზის დაგეგმვისას ითვალისწინებენ.

მნიშვნელოვანია, მომავალმა ან ჩამოყალიბების ეტაპზე მყოფმა მენეჯერებმა იცოდნენ, რომ მხოლოდ ისინი არ არიან გამოწვევების წინაშე და ეს მენეჯერეობის თანმდევი პროცესია

4. ქოუჩინგი

Project Oxigen-ის საშუალებით გაირკვა, რომ კარგი მენეჯერი კარგი მენტორიცაა. Google კარგ მენტორებს ასე ახასიათებს:

· ისინი თანამშრომლებს დროულ და კონკრეტულ Feedback-ს აძლევენ

· მათი Feedback მამოტივირებელი და დამაფიქრებელია

· ისინი თითოეულ თანამშრომელთან ინდივიდუალური კომუნიკაციის სტილს აყალიბებენ და ხშირად აქვთ პირისპირ შეხვედრები

· ისინი აქტიურად უსმენენ საკუთარ თანამშრომელს და ყოველთვის მზად არიან დასახმარებლად

· ისინი ცდილობენ გაიაზრონ საკუთარი თანამშრომლების აზროვნების სტილი

· ისინი ცდილობენ გამოავლინონ თანამშრომლების შესაძლებლობები, რისთვისაც კითხვებს ღიად და პირდაპირ სვამენ

5. შეფასება და უკუკავშირი

მენეჯერის სიტყვებს ძალიან დიდი ძალა აქვს, მათ შეუძლიათ შექმნან და გაანადგურონ მოტივაცია და სურვილი. Google-ში ეს კარგად იციან და ამიტომ, ა მენეჯერებს ასწავლიან: იყვნენ თანმიმდევრულნი უკუკავშირის გაზიარებისას, დააბალანსონ ნეგატიური და პოზიტიური უკუკავშირი, დააფასონ თანამშრომელთა შრომა და მკაფიოდ დაანახონ ზრდის შესაძლებლობები.

6. გადაწყვეტილების მიღება

იმისათვის, რომ მენეჯერების გადაწყვეტილებების სისწორეში დარწმუნდნენ, Google-მა მათთვის ჩამოაყალიბა „გადაწყვეტილებები მიღების რუტინა“, რომელიც მენეჯერებს ეფექტიანი გადაწყვეტილებების მიღებაში ეხმარება. კითხვები, რომლებიც მენეჯერებმა გადაწყვეტილების მიღებისას საკუთარ თავს უნდა დაუსვან ასე ჟღერს:

· რა პრობლემას ან საკითხს აგვარებთ და იზიარებენ თუ არა სხვები თქვენს მიდგომას

· რატომ არის პრობლემა ან საკითიხი მნიშვნელოვანი (ემთხვევა თუ არა კომპანიის მიზნებს?)

· ვინ არის გადაწყვეტილების მიმღები?

· როგორ აღასრულებთ მიღებულ გადაწყვეტილებას?

· როდის უნდა გამჟღავნდეს ხალხთან (კოლეგები, აქციონერები, კლიენტები) გადაწყვეტილების შესახებ?

გადაწყვეტილებების მიღების სისწორეში დასარწმუნებლად, Google მენეჯერებს ასწავლის ხმამაღლა გააჟღერონ იდეები, გაიგონ რას ფიქრობენ სხვები და მკაფიოდ დაასაბუთონ თავიანთი მოსაზრებები (ან გაამყარონ მონაცემებით) შეხედონ საკუთარ გადაწყვეტილებას სხვა ადამიანების პერსპექტივიდან და საბოლოო გადაწყვეტილება სწორედ ამ დაკვირვების შემდგომ მიიღონ.

შეიძლება ინოვაციური ამ 6 მიდგომაში არაფერია, მაგრამ New York Times-ის სტატიის მიხედვით, პროგრამის Oxygen განხორციელების შემდეგ, დაბალი შედეგების მქონე მენეჯერებმა 75%-იანი გუამჯობესება აჩვენეს.