რისკიანი გადაწყვეტილებები

სტეფან კარიმ, NBA-ში კარიერა დიდი მანძილიდან, სამქულიანი ჩაწოდებით აიწყო, რაც იშვიათი იყო კალათბურთის თამაშებში. ტრადიციულად, მცველის პოზიციაზე მოთამაშე კალათბურთელები სამ ქულიან სროლების შესრულებაზე არ ფიქრობენ, რადგან ამ დისტანციიდან ბურთის კალათში მოხვედრის ალბათობა ძალიან დაბალია. თუმცა, Golden State Warriors-ის ვარსკვლავმა მსგავსი სროლების შესასრულებლად ბევრი ივარჯიშა და საბოლოოდ, დიდ წარმატებასაც მიაღწია.

კარის თამაში კონკურენტული რისკის აღების ერთ-ერთი კარგი მაგალითია. სხვა კალათბურთელების პრაქტიკის გამეორების ნაცვლად, სტეფან კარიმ გადაწყვიტა ბურთი კალათში ისეთი დისტანციიდან ჩაეგდო, საიდანაც სხვები არასდროს ისროდნენ.

Charm Offensive-ის დირექტორი, ჯონ ბუჩანი, რომელიც Cold mail მარკეტინგული კამპანიების შემქნელად ითვლება, კარის გამოცდილებას ბიზნეს სტრატეგიის დაგეგმვისას იყენებს. მისი აზრით, მნიშვნელოვანია ადამიანმა მის გარშემო დაინახოს ის შესაძლებლობები, რომელსაც აქამდე ვერავინ ხედავდა, და თუ თვლის, რომ ამ შესაძლებლობის გამოსაყენებლად შესაბამისი ცოდნა და უნარები აქვს, აუცილებლად უნდა გამოიყენოს.

აღმოაჩინო და კარგად გააკეთო ის, რასაც სხვები ვერ აკეთებენ წარმატების შანსს და სწრაფი ზრდის საშუალებას იძლევა. ბიზნესის წამოწყებისას რისკის აღება გარდაუვალია. თუმცა, რისკებს ადამიანები იღებენ და არა ბიზნესები. ბიზნესი ვერ იქნება წარმატებული, თუ მისი მენეჯერი არ არის წარმატებული. დღევანდელ გარემოში ცოტა ადამიანმა იცის, თუ რას ნიშნავს საბაზრო რისკის აღება მაშინ, როდესაც საქმე პირად კარიერას ეხება. საბაზრო რისკი კი გულისხმობს ისეთი შესაძლებლობის დანახვას საკუთარ შესაძლებლობებში ან გარემოში, რომელიც განსხვავებულ შედეგს ან გამოცდილებას ქმნის.

რისკის აღების ისტორიებმა ინოვაციები შექმნა, ისტორიებიდან ერთ-ერთი შესაძლოა ადამიანისთვის კარიერის შექმნის დაჩქარების მაგალითად იქცეს:

პოზიციის შექმნა და გამორჩეული ძალის გამოყენება

სარა ფეინგოლდი, კორპორატიული იურისტი, თავის შემოქმედებით ნიჭს და სიყვარულს სამკაულების ხელით შექნითა და Esty-ის პლატფორმაზე მისი გაყიდვით გამოხატავდა. Estyსარას ძალიან მოსწონდა. გარკვეული დროის შემდეგ, სარამ გაიგო, რომ კომპანია ოპერაციების ცვლილებებს გეგმავდა. მან გადაწყვიტა Esty-ს მომხმარებელთა მხარდაჭერის ცენტრისთვის მიეწრა და მათთვის იურიდიული მომსახურება შეეთავაზებინა. მას შემდეგ რაც სერვის ცენტრისგან პასუხი ვერ მიიღო, სარა პირდაპირ Esty-ს დამფუძნებელს დაუკავშირდა. საუბრის დასრულების შემდეგ, სარა მიხვდა, რომ მას Esty-თვის შეეძლო იმის შეთავაზება, რაც კომპანიას ამ ეტაპზე ნამდვილად სჭირდებოდა. ძალიან მალე, სარამ ნიუ იორკის მიმართულებით ავიაბილეთი დაჯავშნა, Estyს დამფუძნებელს დაურეკა და უთხრა: „ნიუ იორკში თქვენთან შესახვედრად მოვფრინავ - თქვენ გჭირდებათ იურისტი, რომელიც აუცილებლად მე უნდა ვიყო“. სარამ რისკი აიღო და მისი დიდი სურვილის დამსახურებით შეძლო, 10 წელი Esty-ს მთავარ იურისტად ემუშავა. კრეატიულობისა და საკუთარი საქმის სიყვარულით, სარამ კარიერა თავისი ხელით შეიქმნა.

ახალი პროდუქტისა და სერვისის შექმნა

1979 წელს ამერიკაში სესხზე საპროცენტო განაკვეთები ძალიან გაიზარდა და დაახლოებით, 20% შეადგინა, რამაც მაშინდელ საბანკო ინდუსტრიას დიდი დარტყმა მიაყენა. კრეიგ ჰათკოფი, დღეს უკვე წარმატებული ინვესტორი, ფილანტროპი და Tribeca Film Festival-ის თანამდამფუძნებელი,იმ პერიოდში Chemical Bank-ში მუშაობდა და სამსახურის დაკარგვის საფრთხის ქვეშ იდგა. ამ გაურკვევლობის დროს, მას გაუჩნდა იდეა, რომ ლიკვიდური აქტივით სესხის დაფინანსების ნაცვლად, ბანკს მისთვის საკრედიტო გარანტია მიეცა. ეს იდეა დღეს აკრედიტივის სახელითაა ნობილი, რომელმაც Chemical Bank კრიზისიდან გამოიყვანა და საბოლოოდ, საბანკო ინდუსტრიის მნიშვნელოვან ფინანსურ ინსტრუმენტად იქცა. ჰათკოფმა კი სამსახური შეინარჩუნა. რა თქმა უნდა, ყველა ინოვაცია მსგავსი გავლენის მოხდენას ვერ შეძლებს. თუმცა, ყველა კომპანიას აქვს ის სუსტი მხარე, რომელიც გაძლიერებას საჭიროებს. ამის გამოსწორებას კი კონკრეტული ადამიანის მხრიდან რისკის აღება, გამბედაობა და შესაბამისი ცოდნა სჭირდება.

პროფესიის მიღმა შესაძლებლობების მოძებნა

ხშირად, ადამიანები უნივერისტეტის დიპლომში მითითებული პროფესიით არ საქმდებიან. ზოგმა უნივერსიტეტში ასათვისებელი პროფესია მაშინ აირჩია, როდესაც დღეს არსებული დისციპლინების უმრავლესობა საერთოდ არ არსებობდა. დღევანდელ ბაზარზე კიდევ უფრო სწრაფად ჩნდება ახალი პროფესიები, რომლებიც ახალ უნარებსა და ცოდნას მოითხვს. ბიზნესის განვითარებისთვის, დღეს მენეჯერებმა შერჩევის არატრადიციულ მეთოდებს უნდა მიმართონ. ლიზა აუმილერი არის ვეტერინარი, რომელმაც რისკი აიღო და შექმნა მობილური ვეტერინარიის სერვისი. დღეს, დაარსებიდან რამდენიმე წლის შემდეგ, ამ ბიზნესის წლიური ბრუნვა 5 მილიონ დოლარს შეადგენს და 60 დასაქმებული ჰყავს. ბიზნესის წარმატების სისწრაფე, აუმილერის მიერ თანამშრომლების არასტანდარტულმა შერჩევის მეთოდმაც გამოიწვია. აუმილერი ცდილობს ტალანტი თავისი პროფესიის მიღმაც აღმოაჩინოს. ლიზას დასაქმებულები მოდის ინდუსტრიის, ქიმიური საწარმოებისა და სხვა ინდუსტრიების წარმომადგენლები არიან. აუმილერს მოსწონს, როდესაც ადამიანს ვეტერიანიის ჩარჩოებს მიღმა ფიქრი შეუძლია - სხვადასხვა ინდუსტრიის გამოცდილების ვეტერინარიაში გამოყენება კი ამის საშუალებას იძლევა. ამას გარდა, ლიზა ხშირად ასაქმებს სამსახურიდან გათავისუფლებულ ადამიანებს, რადგან დარწმუნებულია, რომ მსგავსი ადამიანები სტატუს ქვოს შესაცვლელად უფრო ხარისხიანად მუშაობენ.

ინოვაციის შექმნის სურვილმა შესაძლოა ადამიანის კარიერაში, გუნდში, კომპანიასა და ინდუსტრიაში მნიშვნელოვანი ცვლილებები მოახდინოს. საბაზრო რისკის აღების გარეშე კი ადამიანის პირადი კარიერისა და ბიზნესის განვითარების ტემპი მცირდება.

ცვლილებების შემქმნელები, უბრალოდ, გამოუყენებელ შესაძლებლობებს არ ეძებენ - ისინი ეძებენ იმ საჭიროებებს, რომელიც მათ ინტერესებსა და შესაძლებლობებს ემთხვევა. რა არის ის რისი გაკეთებაც შენს სფეროში მხოლოდ შენ შეგიძლია? - თუ ამას აღმოაჩენ, ეს შენი წარმატების შესაძლებლობად იქცევა - არ შეგეშინდეს დიდი დისტანციიდან სროლის.