HBR: 3 მეთოდი გუნდის მოტივაციის გასაუმჯობესებლად

Covid-19 ის პანდემიის შედეგად ბევრი ადამიანის მუშაობის ხარისხი და მოტივაცია უარესობისკენ შეიცვალა. ამ რეალობამ მენეჯერები ახალი გამოწვევის წინაშე დააყენა - მათ უნდა გამოიმუშავონ ახალი მიდგომები იმისათვის, რომ თანამშრომლებს ახალი რეალობის სირთულეების დაძლევაში დაეხმარონ .

მენეჯერების უმრავლეობის პასუხისმგებლობა მართვის სტრუქტურისა და კონკრეტული სამუშაო რეგულაციების შემუშავებაა. თუმცა, სამუშაო გარემოზე ჩატარებულმა დაკვირვებებმა აჩვენა, რომ ჯანსაღი გარემოს შესაქმნელად აუცილებელია არა განსაზღვრული ჩარჩოები, არამედ თითოეული თანამშრომლის შინაგანი მოტივაციის ზრდა.

თვითგამორკვევის თეორიაზე დაყრდნობით, HBR-მა გამოავლინა ის სამი მთავარი ფსიქოლოგიური საჭიროება, რომელიც თანამშრომლებს თავდაჯერებულობისა და მოტივაციის გაზრდისათვის სჭირდებათ. ამ საჭიროებების დაკმაყოფილებით მენეჯერები შეძლებენ თანამშრომლებს ახალი გამოწვევების გადალახვაში დაეხმარონ:

1) კავშირი

თანამშრომელი კომპანიისადმი უფრო ლოიალური ხდება მაშინ, როდესაც მენეჯერისგან ზრუნვას გრძნობს. HBR გვთავაზობს რამდენიმე რჩევას, რომელიც მენეჯერებს თანამშრომლებთან ემოციური კავშირის გაძლიერებაში დაეხმარება:

· მენეჯერს თანამშრომლების ემოციებისა და რექციების უნდა ესმოდეს („ვიცი, ახლა ამ საკითხზე კონცენტრირება რთულია, თუმცა ამ გამოწვევას ერთად გავუმკლავდებით)

· მენეჯერს თითოეული თანამშრომლის მიმართ ინდივიდუალური მიდგომა უნდა ჰქონდეს. ამაში მას გუნდის ზომის შემცირება დაეხმარება, შედეგად, თითოეული თანამშრომლის შესრულებული საქმისა თუ წარმატების აღნიშვნას შეძლებს.

· პრობლემის გაჩენისას მენეჯერის მთავარი ფუნქციაა აღმოაჩინოს დაბრკოლებები და გუნდი შესაბამისი მიმართულებით გააძლიეროს. ამაში მას თითოეული დაქვემდებარებულისგან პრობლემასთან დაკავშირებული უკუკავშირის მიღება დაეხმარება.

· გუნდის თითოეულმა წევრმა უნდა იცოდეს, რომ ადამიანის შრომა უნიკალური და აუცილებელია

· მენეჯერმა ყოველთვის უნდა აღნიშნოს, რომ არა მარტო თანამშრომლების პროდუქტიულობის ზრდაზე, არამედ მათ კეთილდღეობაზეც ზრუნავს.

2) კომპეტენცია

კვლევები ადასტურებს, რომ საქმისადმი პასუხისმგებლობა თანამშრომლის სამუშაოს ხარისხსა და მოტივაციას ზრდის. HBR მენეჯერებს გუნდის მოტივაციის გასაზრდელად შემდეგ რჩევებს სთავაზობს:

· მენეჯერებმა თანამშრომლებს საკუთარ პროექტში გადაწყვეტილების დამოუკიდებლად მიღების უფლება უნდა მისცეს. ეს მიდგომა მათ პასუხისმგებლობას და შესაბამისად, მოტივაციასაც გაზრდის.

· თანამშრომლის თადაჯერებულობა და მოტივაცია იზრდება მაშინ, როდესაც ის კოლეგებს თავისი წარმატებული მიდგომების შესახებ ინფორმაციას უზიარებს. კარგი იქნება, თუ მენეჯერები ამ მიდგომას თავის გუნდშიც დანერგავენ.

· მენეჯერებმა რეგულარულად უნდა განიხილონ თითოეული თანამშრომლის პროგრესი და მიზნების მისაღწევად კონკრეტული სტრატეგია დასახონ.

3) დამოუკიდებლობა

კარგი მენეჯერები თანამშრომლებს გადაწყვეტილებების დამოუკიდებლად მიღების საშუალებას აძლევენ, რაც მათ მოტივაციაზეც დადებითად აისახება. HBR მენეჯერებს სთავაზობს რამდენიმე რჩევას, რომლიც მათ თანამშრომლებისთვის დამოუკიდებლობის განცდის გაზრდაში დაეხმარებათ:

· მენეჯერმა ინიციატივები უნდა წაახალისოს.

· მენეჯერებმა თანამშრომლების კონტროლი მინიმუმამდე უნდა დაიყვანონ და ამის ნაცვლად, მათ დადებითი უკუკავშირი ხშირად მიაწოდონ

· ადამიანებს საკუთარი ძალების მაქსიმუმის გამოყენების სურვილი უჩნდებათ მაშინ, როდესაც დავალების მნიშვნელობა სრულად ესმით. ამიტომ, მენეჯერებმა თანამშრომლებს საკუთარი მოთხოვნები უნდა დაუსაბუთონ.

ამ სამი რჩევის აღსრულება უფრო მარტივია ისეთ სამუშაო გარემოში, სადაც ადამიანები ერთმანეთს ფიზიკურად ხვდებიან. ამიტომაც სულაც არ არის გასაკვირი, რომ პანდემიის პირობებში ადამიანების მოტივაცია განსაკუთრებული რისკის ქვეშ დადგა. ადამიანი უფრო მეტად ენერგიული და ლოიალური ხდება მაშინ, როდესაც შინაგანი მოტივაციის, სიამოვნებისა და განვითარების შეგრძნება აქვს. მოტივაცია ადამიანს თავისი საუკეთესო ნაწილის გამოვლენაში ეხმარება. თუ მენეჯერი გუნდის მართვის დროს ამ სამ ფისქოლოგიურ საჭიროებას გაითვალისწინებს, შეძლებს თანამშრომლების მოტივაციის, თავდაჯერებულობისა და დამოუკიდებლობის შეგრძნების გაზრდას.