თავის არიდება - ერთი რამ, რაც ადამიანებს ხელს უშლის წარმატების მიღწევაში

შფოთვა, დისკომფორტი და ცვლილება ყველა ადამიანის ცხოვრების განუყოფელი ნაწილია, თუმცა ისინი ჩვენი მტრები არ არიან. წარმატების მიღწევისთვის განსაკუთრებით მნიშვნელოვანია, თუ როგორ ვრეაგირებთ ამ პრობლემებზე.

ჰარვარდის უნივერსიტეტის ფსიქოლოგი, ლუანა მარკესი, გვიზიარებს მისი პროფესიული გამოცდილების და 20 წლიანი კვლევების შედეგად მიღწეულ მიგნებებს.

„ფსიქოლოგიური თავის არიდება“ ხერხია რითიც ადამიანი უმკლავდება ნებისმიერ მოსალოდნელ საფრთხეს, იქმნის მყისიერ შვებას, თუმცა თავის არიდებას აქვს დროში განგრძობითი უარყოფითი შედეგები.

სრულყოფილი ცხოვრებისთვის აუცილებელია ვისწავლოთ გამოწვევებთან და შიშებთან გამკლავება:

1. უკან დახევა;

ლომს თუ პირისპირ შეეჩეხეთ, პირველი რეაქცია მისგან სასწრაფოდ გაქცევა იქნება. თუმცა ყოველდღიურ ცხოვრებაში, უკან დახევა უფრო რბილი შეიძ₾ება იყოს.

შფოთვისთვის თავის ასარიდებლად შეიძლება სცადოთ ჭიქა ღვინის დალევა, დიდი პროექტის ან პრეზენტაციის დროს სამსახურში ავადმყოფობის გამო არმისვლა, უარი სამსახურზე, სადაც მოგიწევდათ პრეზენტაციების საჯაროდ კეთება.

რისი გაკეთება შეიძლება - ხშირად, ადამიანები უკან დახევის ქცევას რაციონალურ გამართლებას პოულობენ. მაგალითად, ამბობენ, რომ „მე არ მეშინია სიმაღლის, უბრალოდ არ მიყვარს ატრაქციონები“ ან „ვერავინ შეამჩნევს ამ ღონისძიებას დავესწარი, თუ არა“.

დამოკიდებულებების ცვლილებისთვის განსაზღვრეთ ერთი შიში ან ფიქრი და დაუსვით საკუთარ თავს შეკითხვა - რა არგუმენტი მაქვს ამის საწინააღმდეგოდ? ან „რას მეტყოდა ჩემი საუკეთესო მეგობარი ახლა?“. ამ კითხვებზე არგუმენტირებული პასუხები დაგეხმარებათ უარი თქვათ თავის არიდების ტექნიკაზე.

2. რეაქცია;

რეაქცია შეიძლება სხვადასხვა ფორმით გამოიხატოს. მაგალითად, ბევრი შეტყობინების გაგზავნა, რომ ბოლო სიტყვა თქვენ დაგრჩეთ, ათეულობით აზრის მოსმენა, სანამ იმას არ მოისმენთ, რაც თქვენთვის მისაღებია ან ყვირილი, იმისთვის, რომ თქვენი პოზიცია სხვას გააგონოთ.

რისი გაკეთება შეიძლება - პირველ რიგში, აიღეთ შესვენება და არ აირიდოთ თავიდან დისკომფორტის გამომწვევი მიზეზი, პირიქით, გამოიკვლიეთ ის.

მაგალითად, ექიმისგან ანალიზებზე ცუდი პასუხების მიღების შემდეგ არ დაიწყოთ ალტერნატიული ახსნების ინტერნეტში მოძებნა, სცადეთ დაფიქრდეთ პრობლემაზე რამდენიმე წუთით. ღრმად ამოისუნთქეთ და შეეცადეთ სახელი დაარქვათ ყველა გრძნობას რასაც განიცდით. პრობლემა არსად გაქრება, თუმცა მას უფრო ნათელი გონებით გაუმკლავდებით.

3. შეგუება;

შეგუების დროს ადამიანები არ ცდილობენ შეცვალონ მათთვის დისკომფორტული სიტუაცია, მაგალითად არაჯანსაღი ურთიერთობები ან სამსახური, რომელიც მენტალურ და ფიზიკურ ჯანმრთელობაზე ცუდად მოქმედებს.

ასეთ დროს, როგორც წესი, საკუთარ თავს ვეუბნებით, რომ ძალიან ცუდიც არ არის არსებული სიტუაცია, ან რომ ყველაფერი აუცილებლად გამოსწორდება. რეალურად კი, თავს ვარიდებთ აუცილებელ ცვლილებებს.

რისი გაკეთება შეიძლება - განსაზღვრეთ რა არის ყველაზე მნიშვნელოვანი თქვენთვის და ყოველ დღე პატარა ნაბიჯი გადადგით ამ მიზნისთვის.

თუ თქვენთვის მნიშვნელოვანია ოჯახი, დაგეგმეთ დრო მათთან გასატარებლად ყოველ დღე. თუ კრეატიული ოცნება გაქვთ, თქვენი ყოველი დღის პატარა ნაწილი გამოყავით მასზე სამუშაოდ.

სამსახურში წასვლამდე 5 წუთსაც კი შეუძლია ცვლილებების გამოწვევა.