6 კითხვა, რომელიც კომპანიებმა მენეჯერულ პოზიციაზე თანამშრომლის დაწინაურებისას უნდა დასვან

სწრაფად განვითარებადი კომპანიების CEO-ები, ბიზნესის ზრდასა და განვითარებაზე ფიქრისას, ერთ დიდ პრობლემას აწყდებიან - მათ ცვლილებების გასაძღოლად და თანაც, მცირე ვადაში, სწორად შერჩეული თანამშრომლები სჭირდებათ.

როგორც ცნობილია,ადამიანური კაპიტალი სწრაფად მზარდი კომპანიებისთვის შეზღუდულ რესურსს წარმოადგენს და განსაკუთრებით კი მენეჯერულ პოზციზებზე. კომპანიის ზრდის ტემპის პარალელურად, უფრო და უფრო რთული ხდება ისეთი ტალანტის მოძიება, რომელიც გუნდს სათავეში ჩაუდგება.

ცვლილებებისა და განვითარების პროცესში მყოფი კომპანიების ტალანტების მოძიების სტრატეგია, ხშირ შემთხვევაში, არსებული თანამშრომლის დაწინაურებაა. ეს სტრატეგია წარმატებულია მაშინ, როდესაც კომპანია მენეჯერულ პოზიციაზე სწორად შერჩულ თანამშრომელს დააწინაურებს. საჭიროების სწრაფად მოგვარების მიზნით, კომპანიებინაჩქარევ გადაწყვეტილებებს იღებენ და არასწორ ადამიანებს არასწორ პოზიციებზე ნიშნავენ, რაც ცალსახად უარყოფით შედეგებს იწვევს.

Inc.com გვთავაზობს იმ 6 შეკითხვას, რომელიც აუცილებელია კომპანიის მენეჯერებმა თანამშრომლის დაწინაურებამდე დასვან. ამ შეკითხვებზე პასუხები მენეჯერებს დაეხმარებათ შეაფასონ, სად შეიძლება გადააწყდნენ სირთულეებს და რა მიმართულებით დასჭირდებათ დაწინაურებულ თანამშრომლებს მხარდაჭერა.

1) არის თუ არა დაწინაურება თანამშრომლის სურვილი?

წინსვლა და პროგრესი თითქმის ყველა ადამიანის სურვილია. მიუხედავად ამისა, მენეჯერი თანამშრომლის დაწინაურებამდე უნდა დარწმუნდეს, რომ თანამშრომელი საკუთარ წინსვლას შეთავაზებულ პოზიციაზე ხედავს. ადამიანის სურვილისა და შინაგანი მოტივაციის გარეშე, მისი დაწინაურების გადაწყვეტილება უარყოფითი შედეგების მომტანი იქნება.

2) შეძლებს თუ არა ის საკუთარი თავის მართვას?

მენეჯერული პოზიცია მეტ პროექტს, მეტ ადამიანს, მეტ საქმესა და მეტ პასუხისმგებლობას ნიშნავს. იმ თანამშრომელს, რომლის დაწინაურებასაც კომპანია მენეჯერულ პოზიციაზე გადაწყვეტს, აუცილებელია, რამდენიმე სამუშაოს ერთდროულად მართვის, პრიორიტეტების დალაგებისა და დროის ეფექტურად მართვის უნარი ჰქონდეს. წინააღმდეგ შემთხვევაში, დაწინაურებული თანამშრომელი ახალ გამოწვევებსა და დაკისრებულ პასუხისმგებლობებს ვერ გაუმკლავდება.

3) აქვს თუ არა შესაბამისი უნარები?

დაწინაურება ახალ უნარებსა და შესაძლებლობებს მოითხოვს. ამიტომ, თანამშრომლის დაწინაურებამდე კომპანია უნდა დარწმუნდეს, რომ მას აქვს აღნიშნული პოზიციისთვის საჭირო უნარები. ეს უნარები რა თქმა უნდა, სწავლებადია. მიუხედავად ამისა, კარგი იქნება, თუ მენეჯერს ეცოდინება რა არის დაწინაურებული თანამშრომლის ხარვეზიანი უნარები, რადგან ამ უნარებს მენეჯერი განვითარების გეგმის ნაწილად აქცევს.

4) შეძლებს თუ არა გუნდის მართვას?

კლასიკური შეცდომა, რომელსაც კომპანიები ხშირად უშვებენ დამწყები მოთამაშის მენეჯერად დაწინაურებაა. მხოლოდ იმიტომ, რომ თანამშრომელი კარგი გაყიდვების მენეჯერი ან კარგი დეველოპერია, არ არის აუცილებელი პირობა, რომ ის წარმატებული მენეჯერი იქნება. ხშირს შემთხვევაში, კარგი ტექნიკური თანამშრომლები საშინელი მენეჯერები ხდებიან, რადგან მათი მოლოდინები და სტანდარტები გუნდის სხვა წევრებთან შედარებით ბევრად მაღალია.

5) შეესაბამება თუ არა კომპანიის კულტურას?

მენეჯერულ პოზიციაზე დაწინაურების შემდეგ, თანამშრომელი კომპანიის კულტურაზე უფრო მეტ გავლენას ახდეს. თუ თანამშრომელი კომპანიის კულტურას არ ერგება, მისთვის მეტი ძალაუფლებისა და გავლენის მინიჭებით, პრობლემა კიდევ უფრო საშიში ხდება. ასეთ შემთხვევაში, კომპანია კიდევ უნდა დაფიქრდეს, რამდენად სწორია მსგავსი თანამშრომლის დაწიინაურება.

6) შეუძლია თუ არა სტრატეგიული გადაწყვეტილებების მიღება?

დაწინაურების შემდეგ, თანამშრომელს ყოველდღიურ სამუშაოებთან ერთად, სტრატეგიული დაგეგმვა და გრძელვადიანი გადაწყვეტილებების მიღება უნდა შეეძლოს. თანამშორმლის დაწინაურებამდე, კომპანია უნდა დარწმუნდეს, რომ თანამშრომელს სტრატეგიულად ფიქრის უნარი და ბიზნესის გრძელვადიანი პერსპექტივების ხედვა აქვს. გადამზადებით ამ უნარის გამომუშავებაც შესაძლებელია, თუმცა, კომპანია უნდა დარწუნდს თუ რა დრო და რა რაოდენობის შრომაა საჭირო სტრატეგიული უნარის გასავითარებლად.

კომპანიისთვის არსებული თანამშრომლის დაწინაურება ძალიან ეფექტური და სასურველი სტრატეგიაა - გუნდი კარგად იცნობს თანამშრომელს და მენეჯერსაც შეუძლია სწორი არჩევანი გააკეთოს, რადგან შეუძლია თანამშორმლის შესაძლებლობების, კულტურული შესაბამისობისა და თავდაჯერებულობის დონის შეფასება. ვინაიდან არასწორად დაწინაურებული თანამშრომელი კომპანიის პრობლემა ისევე ხდება, როგორც არასწორად შერჩეული თანამშრომელი, კარგი იქნება, თუ კომპანიები თანამშრომლის დაწინაურების გადაწყვეტილების მიღებამდე, შემოთავაზებულ 6 კითხვას დასვამენ და შესაძლო რისკებს ან დაბრკოლებებსაც გაანალიზებენ.