კონსტრუქციული და დესტრუქციული უკუკავშირი

კონსტრუქციულ და დესტრუქციულ უკუკავშირებს შორის განსხვავების გააზრება დაგეხმარებათ პროფესიულ ზრდაში. თქვენ უკეთ მოახერხებთ დაინახოთ რომელი შეფასების მიზანია თქვენი უნარების განვითარება და პირიქით, რომელი აკნინებს თქვენს თავდაჯერებულობას.

კონსტრუქციული უკუკავშირი მოიაზრებს ადამიანის ქმედებების, მის მიერ შესრულებული საქმის იმგვარ შეფასებას, რომელიც ხაზს უსვამს მის სიძლიერეებს, სთავაზობს გაუმჯობესებისთვის საჭირო რეკომენდაციებს. კონსტრუქციული უკუკავშირის დროს უნდა გააზიაროთ რა ქმედითი ნაბიჯების გადადგმა შეუძლია დასაქმებულს შედეგების გასაუმჯობესებლად. მეორეს მხრივ, დესტრუქციული უკუკავშირი ხშირად შედგება დაუსაბუთებელი კრიტიკისგან, ზოგადი შეფასებებისგან და პირარი შეურაცხყოფისგან. ხშირად, ამ ტიპის შეფასებას იყენებენ სხვისი თავდაჯერებულობის დასაკნინებლად.

Gallup-ის 2018 წლის კვლევით დადგინდა, რომ დასაქმებულებს 89,1%, რომლებიც იღებდნენ უარყოფით უკუკავშირს, არ ჰქონდათ სამოქმედო გეგმა და პრობლემების მოგვარების გზები, ისინი უფრო ნაკლებად იყვნენ ჩართულები ყოველდღიურ სამუშაო პროცესებში და ეძებდნენ ახალ სამსახურს. ეს კვლევა ადასტურებს, რომ უკუკავშირის დროს მნიშვნელოვანია მისი გაცემის სიხშირე, სტილი და განზრახვა.

კონსქტრუქციული უკუკავშირი

- რელევანტური და დროული;

უკუკავშირი ეფექტური მაშინ არის, როდესაც მისი გამომწვევი ქმედების ან შედეგის დადგომიდან მალევე ხდება. დროული კრიტიკა რელევანტურია და უფრო მეტი ალბათობით გამოიწვევს ცვლილებებს. უკუკავშირის დაგვიანება შეამცირებს მის ეფექტს.

- კონკრეტული და ქმედებებზე ორიენტირებული შეფასება;

უკუკავშირისას გააზიარეთ კონკრეტული მაგალითები, ამასთანავე, შესთავაზეთ დასაქმებულს გაუმჯობესების სხვადასხვა გზა და შესაძლებლობა.

- დაბალანსება;

კონსტრუქციული უკუკავშირისას ყურადღება მხოლოდ სისუსტეებზე ან გასაუმჯობესებელ უნარებზე არ გაამახვილოთ. გაუზიარეთ დასაქმებულს თქვენი აზრი მის ძლიერ მხარეებზე, კარგად განვითარებულ უნარებზე.

დესტრუქციული უკუკავშირი

- ბუნდოვანი და ზოგადი;

ამ ტიპის შეფასებით ნაკლებად სავარაუდოა რაიმე შედეგს მიაღწიოთ, რადგან არ ხდება კონკრეტული საკითხების იდენტიიცირება. თუ უკუკავშირისას არ განიხილავთ ქმედებებს, კონკრეტულ დავალებას, დამსაქმებლის მიერ არასწორად შესრულებულ საქმეს, მას არ აძლევთ განვითარების შესაძლებლობას. სიცხადის ნაკლებობა თუ რა არის წარმატება და როგორ შეიძლება მისი მიღწევა, ხშირად ადამიანებს იმედგაცრუებულს ტოვებს.

- საჯარო დამცირება;

საჯარო გარემოში, კოლეგების თვალწინ გაზიარებული უარყოფითი უკუკავშირი, შედეგად დახმარების ნაცვლად, ადამიანების დამცირებას ემსახურება. ამ ფორმით საჯარო კრიტიკა მიუღებელი და დაუშვებელია. ასეთ დროს დამსაქმებელი არ სცემს დასაქმებულის უფლებას პატივს მოისმინოს მისი საქმიანობის შეფასება ღირსეულ გარემოში.

- პირადი შეტევა;

არაკონსტრუქციული უკუკავშირის სამიზნე ადამიანის პიროვნება და მისი საქციელია და არა კონკრეტული საქმე, დავალება და მისი შედეგი. ადამიანის პიროვნების ცვლილებაზე მარტივია მისი საქციელების შეცვლა. პიროვნული შეტევის მიზანი ნაკლებად არის დასაქმებულის პროფესიული განვითარება, მის შედეგად მხოლოდ ადამიანის დამცირება დგება.